=1
Mu kiganiro na IGIHE, Andy Bumuntu yahamije ko amaze iminsi mu myiteguro yo guhatana muri iri siganwa ku maguru rimaze kubaka izina ‘Kigali International Peace Marathon’ rigiye kuba ku nshuro ya 18.
Aha yagize ati “Ndi kwitegura guhatana muri kimwe cya kabiri cya Marathon, ni ukuvuga ibirometero 21, ndashaka umudali, ntabwo nshobora gukinisha kwiyandikisha nziko ntazahatana.”
Andy Bumuntu avuga ko atari ugushaka kwitabira ‘Kigali International Peace Marathon’ gusa ahubwo ari mu myiteguro ikarishye yatuma anegukana umudali.
Uyu muhanzi ahamya ko aho ageze imyitozo hamuha icyizere cyo kuzitwara neza nubwo agikomeje imyitozo.
Uyu mwaka iri rushanwa rizitabirwa n’abakinnyi bakomeye barimo Umunya-Ethiopia Muluhabt Tsega wegukanye umwanya wa kabiri muri Copenhagen Marathon ndetse akaba yaritwaye neza muri Hangzhou Marathon Champion.
Hari kandi Berhanu Heyem na we ukomoka muri Ethiopia, Eric Kiprono Kiptanui wo muri Kenya na Merhawi Kesete ukomoka muri Eritrea.
Mu basiganwa Igice cya Marathon ari na cyo Andy Bumuntu azitabira [ibilometero 21,098], uwa mbere mu bagabo no mu bagore azahabwa 5000$ [asaga miliyoni 5,5 Frw] mu gihe mu mwaka ushize yari 2500$.
Uwa kabiri azabona 4000$, uwa gatatu ahabwe 3000$. Mu mwaka ushize yari 2000$ ku wa kabiri ndetse na 1500$ ku mukinnyi wabaye uwa gatatu.
Kuva ku mwanya wa kane kugeza ku wa munani bazabona 2000$, 1000$, 800$, 500$ na 400$.
Ni mu gihe umukinnyi uzegukana marathon mu bagabo n’abagore azahabwa ibihumbi 20$ [asaga miliyoni 22 Frw] mu gihe mu 2022, abayegukanye bahawe ibihumbi 4$.
Uwa kabiri azahabwa ibihumbi 15$ naho uwa gatatu atware 7500$. Ni mu gihe mu mwaka ushize yari 2500$ na 2000$ kuri iyo myanya yombi.
Ibihembo ku mukinnyi wa kane byageze ku 5000$ bivuye ku 1500$ na ho ku wa gatanu biba 3000$ bivuye ku 1000$.
Hongerewe kandi amafaranga azahembwa abakinnyi baje mu myanya umunani ya mbere aho uwa gatandatu azahabwa 2000$, uwa karindwi ahabwe 1500$ naho uwa munani abone 1000$.