=1
Nyuma y’umukino w’Umunsi wa 28 wa Shampiyona warangiye AS Kigali FC itsinze Gasogi United ibitego 2-1, Kakoza Nkuliza Charles yongeye kwikoma abasifuzi batamubaniye abicishije mu kiganiro Rirarashe cya Radio One kuri uyu wa Mbere, tariki ya 8 Gicurasi.
Yagize ati "Ni uko Abanyarwanda tutagira umuco mwiza, wenda akaba yakwegura bitewe n’impamvu runaka. Nakifuje ko mu matora azabaho yaba umuntu wa mbere. Nibaza niba we [Rurangirwa] iyo arebye ibintu biba bitamutera isoni. Ameze nka wa Mugabekazi w’umutsindirano, niba ananiwe agende.”
Yakomeje agira ati “Turabivuga abantu bati ’Gasogi’, ariko imikino ibera ku karubanda. Iyaba itarambuwe imikino ingana kuriya ni yo iba iyoboye Shampiyona. Ku giti cyanjye nta kibazo ngirana na Rurangirwa, ariko ibikorwa bye bifutamye...Turi inshuti ariko iyo unaniwe uba unaniwe. Umwaka utaha nibikomeza gutya ntibizakunda."
Si ubwa mbere Perezida wa Gasogi United yavuze kuri ibi bibazo bihora bitangwa muri Ferwafa ariko abasifuzi bakabyitambika ntibigire aho bigera kubera izindi nyungu bakuramo.
KNC avuga ako ashingiye ku myaka Rurangirwa Aaron afite, agashingira ku buremere bw’inshingano afite no ku bindi bikorwa bya siporo abamo, adapfa kubona umwanya wo gutunganya ibintu biri mu misifurire.
Rurangirwa Aaron na we ari mu bari batanze ubwegure bwabo mu nkundura yo kwegura kw’abakozi n’abayobozi benshi muri FERWAFA, ariko nyuma yo kubisabwa na bamwe mu bamukuriye, aguma ku mwanya we.
Byatewe n’uko iyo yegura, umubare w’abagize Komite Nyobozi y’iri Shyirahamwe wari guhita uba muto ku bashobora gufata ibyemezo, bityo igaseswa burundu kandi hagomba kubaho igihe cyo gutegura amatora no kuba ibikorwa bitandukanye bikomeza nk’ibisanzwe.
Nyuma yo kuvuga ku ikipe ye, yagarutse kuri Gorilla FC, yahagamye Rayon Sports ikayibuza amahirwe yo kuguma guhatanira Igikombe cya Shampiyona benshi bari bawufashe nk’umukino iza guhabwa.
Ati "Ubu rero Hadji Yusuf Mudaheranwa, wakoze cyane. Utangiye kugaragaza ko nta mikino, uciye amagambo. Ariko nabonye umupira myugariro atanze mbanza kugira ubwoba. Nyuma yaho ikipe yihereranye indi.”
Nyuma y’imikino 28 imaze gukinwa muri Shampiyona, Gasogi United iri ku mwanya wa munani n’amanota 39, mu gihe umwanya wa mbere ufitwe na Kiyovu Sports ifite amanota 60.
